أصعــــب مشـــاهد التهجـــــــــير !!

=====================
مشهد التهجير البشري مؤلم و مقبض للقلب لابعد الحدود ،
فما بالك لما ناس تتهجر أربع مرات.. ويعيشوا نفس المأساه أكتر من مره .. وأكتر من جيل؟؟؟؟؟


أصعب مشهد
انك تتهجر في صنادل مخصصة أصلاً لنقل البهايم والحيوانات
مع إن الحكومه صرفت تعويضات بأسمنا لتهجيرنا بطريقه أدميه !!
لكنها للأسف أهتمت بالأحجار أكتر من البني أدمين ؟؟

أصعب مشهد
إنك تجبر في شهر الحصاد تسيب البلح محصولك الرئيسي علي النخيل و تمشي
و تتمنع انك حتي تأخد الفسايل تزرعها في الارض الجديدة
وكانت حجتهم إننا رايحين الجنه الموعوده ؟؟

أصعب مشهد
لما كان صوت العويل والنحيب بيغطي على صفارات الصنادل ....
أباء وأمهات بيبكوا و الستات رايحه جايه بتملا الازيار و كأن في حد ها يرجع يشرب منها ....

أصعب مشهد
لما كانت كلاب الحراسة بتجري علي الشط و تنبح و وقفت لما تعبت و بعد اصحابها و الصنادل ماشية
حتى أن بعضها رمى نفسه في الميه ..
وسعيد الحظ اللي كان صاحبه يحن عليه ويقتله على الشط علشان مايموتش من الجوع

أًصعب مشهد
أنك تتفاجئ بإن الجنه اللي قالوا عليها تطلع صحرا مالهاش أخر
وبعد ما كانت عينيك بتتكحل من ميه النيل .. تتملي رمله ؟؟
وتتفاجئ بأن كبار السن والأولاد الصغيرين بيموتوا بسبب وباء مجهول
وماتلاقيش ميه نضيفه أو بيت أدمي أو حتى علاج
وكأن الحكومه جابتك هنا علشان تخلص عليك وعلى أسرتك ؟؟

مش هقول غير كلمه واحده

حسبي الله ونعم الوكيل